A Xunta establece axudas para cubrir danos persoais, en vivendas, en explotacións agrícolas, en establecementos comerciais e en infraestruturas municipais
As subvencións desenvolveranse ao abeiro de ordes específicas de diferentes departamentos autonómicos, que serán publicadas nos próximos días no DOG
O Centro de Información e Atención ao Cidadán 012 facilitará aos afectados polo temporal información sobre o contido deste decreto
O Consello da Xunta aprobou hoxe o decreto de medidas urxentes para a reparación dos danos causados polo temporal acaecido en Galicia a partir do 23 de xaneiro. A súa concesión terá carácter subsidiario respecto de calquera outro sistema de cobertura de danos, público ou privado, estatal ou internacional, de que poidan ser beneficiarios os afectados. Non obstante, cando estes sistemas non cubran a totalidade dos danos producidos, as indemnizacións previstas no texto concederanse con carácter complementario e serán compatibles en concorrencia con outras subvencións, ingresos ou recursos ata o límite do valor do dano producido.
Estas axudas desenvolveranse ao abeiro de ordes específicas de diferentes departamentos autonómicos, que serán publicadas nos próximos días no Diario Oficial de Galicia. Entenderanse competentes para a concesión das subvencións:
Para axudas por danos persoais, a Consellería de Economía e Facenda
Para axudas por danos causados en vivendas e instalacións complementarias, a Consellería de Vivenda e Solo.
Para axudas para reposición de infraestruturas e equipamentos privados, a Consellería do Medio Rural.
Para axudas por danos e perdas nas explotacións agrícolas, gandeiras e forestais, a Consellería de Medio Rural.
Para axudas para compensar os danos sufridos en establecementos comerciais, industriais, turísticos e mercantís incluídos no seu ámbito competencial, a Consellería de Innovación e Industria.
Para axudas para compensar os danos sufridos en establecementos comerciais, industriais, turísticos, mercantís e deportivos situados en instalacións portuarias de titularidade autonómica, o ente público Portos de Galicia.
Para axudas ás entidades locais ou actuacións directas sobre os seus bens, a Consellería de Presidencia, Administracións Públicas e Xustiza; a Consellería de Política Territorial, Obras Públicas e Transportes; a Consellería de Innovación e Industria; a Consellería de Cultura e Deporte; e a Consellería do Medio Ambiente e Desenvolvemento Sostible, no ámbito das súas respectivas competencias e funcións.
Axudas por danos persoais e en vivendas
Segundo o decreto, as axudas por danos persoais concederanse por falecemento, por incapacidade absoluta permanente e por lesións provocadas polo temporal que causasen a hospitalización da persoa ferida. O seu importe será de 18.000 euros para o caso de falecemento e incapacidade permanente absoluta; e de entre 60 e 103 euros por día de hospitalización.
Así mesmo, serán obxecto de axuda os danos causados nas vivendas que sexan residencia permanente e habitual e nas súas instalacións complementarias, na parte non comprendida nas axudas que aproben outras administracións públicas. Cubrirase ata o 100% do valor de reparación do inmoble danado, sen que o importe da axuda poida superar o límite do 100% do prezo de venda dunha vivenda de promoción autonómica de prezo xeral na mesma localidade.
No que se refire aos danos causados no resto das vivendas e nas súas instalacións complementarias, recibiran subvencións ata acadar o 40% do valor da súa reparación e sen que o importe da axuda supere o 40% do prezo de venda dunha vivenda de protección autonómica na mesma localidade. As vivendas deberán dedicarse polo menos a vivenda ocasional, polo que quedan excluídas destas axudas as edificacións ruinosas e as que se atopen en manifesto abandono.
O texto do decreto especifica que se entenden por vivenda as construcións anexas e instalacións complementarias e elementos comúns no caso de comunidades de propietarios; mentres que as instalacións complementarias son as construcións e equipamentos de apoio á economía e vida familiar, como pozos, hórreos, alpendres, invernadoiros para autoconsumo, instalacións eléctricas e de iluminación, instalacións de telecomunicacións, etc. que estean situadas no mesmo predio da vivenda. O importe máximo por danos en instalacións complementarias non poderá ser superior a 3.000 euros.
Os beneficiarios destas axudas serán os propietarios, usufrutuarios ou arrendatarios dos bens referidos que sufragasen os gastos necesarios de reparación ou reposición.
Explotacións agrícolas e establecementos comerciais
Doutra banda, recibirán indemnizacións polos danos causados polo temporal as explotacións agrícolas, gandeiras e forestais, tanto nas instalacións e edificacións propias da actividade como nas producións afectadas, que non fosen cubertas polas medidas que puidesen adoptar outras administracións ou por calquera fórmula de aseguramento, público ou privado.
Tamén serán obxecto de axuda os danos provocados nos establecementos comerciais, industriais, turísticos ou mercantís nas súas edificacións, instalacións,
maquinaria e nas mercadorías neles depositadas, así como nos vehículos comerciais ou industriais afectos a estas actividades. Só quedarán excluídas da percepción destas axudas as empresas de xeración, distribución e transporte de enerxía eléctrica.
Instalacións portuarias e entidades locais
O decreto aprobado hoxe tamén fai referencia ás axudas para compensar os danos sufridos en establecementos comerciais, mercantís, industriais, turísticos e deportivos situados en instalacións portuarias de titularidade autonómica a consecuencia dos estragos ocasionados polo temporal nas súas edificacións, instalacións, equipamentos, maquinaria e nas mercadorías depositadas neles, así como nos seus vehículos comerciais ou industriais.
Así mesmo, o texto establece que serán obxecto de axuda ou de actuación directa sobre os bens afectados -segundo os casos- os danos provocados en infraestruturas locais non previstos nas axudas que para o efecto puidesen aprobar outras administracións, así como os gastos extraordinarios en que incorresen como consecuencia directa do fenómeno meteorolóxico.
Quedarán excluídas as infraestruturas de xeración, transporte e distribución de enerxía eléctrica. O Centro de Información e Atención ao Cidadán 012 facilitará aos afectados polo temporal información sobre o contido deste decreto.