Despois de ler a entrevista co alcalde piloto que ten "aguante" no rally e na alcaldía só queda unha posible solución: xa está todo resolto ou en estudo e os problemas desapareceron porque o di o PP.
O BNG está a rexurdir como a única alternativa de goberno real, cun equipo que fala coa xente, arrima o ombreiro cara ó ben común e sabe gardar as formas e a prudencia necesaria que require a política.
O PP está fóra de sitio, repite o que xa estaba feito e carece de proxectos cribles de futuro. Dá a impresión de que está a gobernar un grupiño indefinido sen ideas e sen proxectos que improvisa sobre a marcha, sen experiencia e sen capacidade para facer nada distinto.
Hai que agradecer en todo caso que o alcalde do PP clarifique que non vai cambiar nada do que xa había coa empresa concesionaria do servizo de abastecemento, depuración e saneamento. Evidentemente, o BNG xa sabía que o PP era máis do mesmo porque entre outras cousas un membro destacado dese partido que foi en tempos pasados portavoz municipal nun concello limítrofe, ex-alto cargo da Xunta e xerente dunha coñecida empresa que trata os lodos da depuradora de Cabanas-Pontedeume foi o primeiro que lle puxo freo á investigación da Comisión da Auga ao non aportar a facturación da concesionaria.
Pero hai máis, o PP tamén freou as fiscalizacións do Consello de Contas e da Facenda propostas polo BNG no Pleno da Corporación, aquí en compañía dos actuais compañeiros de batalliñas: AEC e IVC. O trío das caravelas tamén eliminou os cartos para facer un estudo de custos... E o Concello así non tiña nada con que reclamar, só un informe presentado polo Grupo Municipal do BNG en marzo de 2006, un informe da bióloga municipal e as recomendacións do Valedor que quedaron en auga chirla e que tampouco defenden a ninguén por si soas.
A xestión do BNG foi boa, porque se puxeron tódalas iniciativas enriba da mesa e evidenciáronse os obstáculos que entorpecen a clarificación do problema. Descubriuse totalmente a nefasta vontade política de dicir unha cousa na rúa e outra no campanario propia do PP de tódolos tempos e dos seus actuais axudantes. O resultado é coñecido, provocaron que o Concello perdese un xuízo porque bloquearon cos seus votos as investigacións e manipularon o que é dos veciños e veciñas: o dereito á transparencia. Perdeuse o xuízo porque o Concello se deixou perder e así se recoñece nunha sentenza que bota en cara que nunca se lle reclamou por ningunha vía unha cantidade á concesionaria pese aos indicios indicados nos informes dos biólogos e polo Valedor. O BNG nunca tivo a alcaldía e no período do xuízo houbo tres alcaldes diferentes e todos fixeron o mesmo: "de brazos cruzados". Botarlle a culpa ao único que rema, cando todos miran para el cos brazos cruzados, é conto vello.
O runrun que se oe polas fontes e corredoiras xa é: "Campos dita, Pepe oe e Castrillón copia".
Do caso do Penso hai que agardar un pouquiño máis, pero a parrula hase ver co tempo.
Segundo o alcalde xa non hai crispación nos plenos, pero non sabe que a banda da dereita é o banco da crispación! Tampouco ten orde o alcalde nos Plenos, ou mellor dito ten a orde do seu interese político, e indigna escoitar comentarios malsoantes e chulescos de persoas retribuídas con erario público diante da pasividade do presidente: igualiño que antes.
