Un acto ilusionante, unhas intervencións políticas de envergadura e unha esperanza de emprego para Ferrolterra. Para que a mocidade viva e desenvolva a súa comarca primeiro debe ter emprego nela.
Alí estivemos!
Polo seu interese tamén reproducimos un artigo de Carlos Aymerich que viu a luz esta semana n' A Nosa Terra.
FERROL E O PSOE
Vicente Irisarri, presidente do ente público “Portos de Galicia” e candidato do PSOE á alcaldía de Ferrol, quer ver imediatamente en Bruxelas ao conselleiro nacionalista de Industria, Fernando Blanco. Un Irisarri nervoso rétao, nun comunicado de imprensa, a “explicar aos ferroláns que xestións prevé realizar co fin de dar conta na UE do plano de Barreras para construir buques civís en Navantia-Fene”. Pode estar tranquilo o Sr. Irisarri: o vindouro venres, 16 de Febreiro, Fernando Blanco vai explicar en Fene, nun acto público convocado polo BNG, o traballo que o nacionalismo está a facer para que os estaleiros da ría ferrolá poidan voltar á construción naval civil.
Seica para estes destacados dirixentes do PSOE Galiza debe seguir á espera do que o Estado e a UE decidan. Non debe ousar o Goberno galego – e ainda menos o nacionalismo! – a cuestionar os compromisos asumidos coa UE, ainda que non se lle dese participación nin tampouco, o que é máis grave, información ningunha sobre estes acordos. E se alguén quer construir buques civís no estaleiro de Perlío saiba que terá que pagar os 1200 millóns de euros que en axudas ilegais distribuíu o goberno español entre os estaleiros públicos da vella Izar. Pouco interesa que no de Fene non se investise nen un só peso. Ao fin, todo é procurar excusas para non cuestionar un status quo estatal que concentra en Andalucía a construción naval pública e, de paso, impedir que alí onde fracasou o malfadado “Plan Ferrol” poida ter suceso unha iniciativa nacionalista. Pouco lle importa ao PSOE que polo camiño Ferrolterra siga a perder poboación e emprego. Non sería a primeira vez a este partido, Ferrol sábeo ben, non lle treme a man.
Xa que logo o PSOE faría ben en definirse e en esclarecernos, a todos os galegos, se é que realmente está comprometido coa construción naval civil na ría de Ferrol. Se vale máis a palabra de Martínez Robles, Irisarri, Rosa Miguélez ou Xavier Carro que a de Zapatero ou Touriño. Se está a traballar na UE – ao menos co mesmo empeño que o empregado no asunto ENDESA – para mudar un acordo lesivo para Galiza ou se, en realidade, está a presionar para que a comisaria europea de concorrencia, Neelie Kroes, nen tan sequer receba ao Conselleiro de Industria.
Di Touriño que Galiza ten dereito a renegociar o acordo suscrito coa UE. Máis, falando de dereitos, non abondan as declaracións. Os dereitos hai que exercelos. E iso, xustamente, é o que o BNG tenta facer en beneficio de Ferrolterra e de Galiza. Apesar do PSOE.
O PP tampouco se debe librar destas críticas... porque gobernou como o fai o PSOE oito anos no Estado e dezaseis en Galiza. O único que conseguiu a dereita coa aplicación da GRAN POLÍTICA DO ESTADO ESPAÑOL foi que a maioría da mocidade emigraramos de Ferrolterra para conseguir un choio e endebedarnos para ter unha vivenda nos novos focos de traballo.
Nin Plan Ferrol, nin Plan Galicia:
TODO A MESMA PUBLICIDADE, TODO A MESMA POLÍTICA DO ESTADO ESPAÑOL.A moción presentada polo BNG este luns pola mañá sobre o asunto non foi incluída polo alcalde despois de oír o secretario na orde do día do Pleno do vindeiro xoves ás 19.30 h.
GRUPO MUNICIPAL DO BNG
MOCIÓN
ASUNTO: Apoio ao plan industrial para o Estaleiro de Fene
Ó abeiro do establecido no artigo 27.3 do Regulamento orgánico municipal, e para ser debatida no próximo Pleno da Corporación o Grupo político municipal do Bloque Nacionalista Galego presenta a seguinte moción:
EXPOSICIÓN DE MOTIVOS
No ano 1972 Astano era un estaleiro privado con capacidade para 350.000 Tm de aceiro e un plantel de 6.000 traballadores/as.
No ano 1984 o estaleiro Astano de Fene utilizouse como moeda de cambio en Bruxelas para iniciar a reconversión naval do Estado español e facer posíbel as axudas públicas ao sector dos estaleiros públicos civís do Estado.
Posteriormente, no ano 1987 prohibíuselle a construción de buques, adicándose o estaleiro á fabricación de plataformas off-shore. A prohibición sobre a construción de buques reiterouse co Plano Estratéxico de Competitividade (PEC), elaborado polo PSOE no ano 1994 e aprobado polo PP no 1997.
O Goberno podía solicitar o levantamento do veto no 2002.
Logo da catástrofe do Prestige, o Consello de Ministros celebrado en xaneiro de 2003 na Coruña, acordou solicitar da Comisión Europea que erguese as restricións á construción de buques á empresa denominada daquela Izar-Fene. Porén, dende agosto de 2003, despois da entrega da plataforma encargada pola empresa Statoil, as gradas de Fene están valeiras e sen carga de traballo propia.
Por último, o 16 de decembro de 2004 asinouse o acordo entre a SEPI e os sindicatos estatais onde Izar Fene se integra en Navantia e no punto 4º se limita a actividade civil durante 10 anos. Asemade, a SEPI, propietaria de Navantia comprometeuse a presentar un plan industrial para a comarca de Ferrolterra, algo que a data de hoxe aínda non fixo.
Por mor deste acordo producíronse 1.400 prexubilacións en Ferrol e Fene, e Navantia Fene quedou con 360 traballadores/as moitos/as deles/as transladados a Ferrol. Deste xeito Fene, con 800.000 metros cadrados, convértese nunha compañía auxiliar de Ferrol e non nun auténtico estaleiro, que está a realizar bloques para buques militares da antiga Bazán.
No mes de novembro de 2005 a Consellaría de Innovación e Industria, ante a falla evidente de ocupación plena do estaleiro de Fene, propuxo ao presidente da SEPI a constitución dunha comisión para a reindustrialización de Ferrol, proposta que este aceptóu.
O 5 de xullo de 2006 constituíuse a comisión formando parte dela as asociacións de empresarios/as da comarca e os tres sindicatos maioritarios. A SEPI decidíu non formar parte da comisión.
O 25 de setembro de 2006 a consellaría convocou unha xuntanza desa comisión, á que a SEPI decide non asistir, e entrega aos axentes sociais un plan de viabilidade para o desenvolvemento da industria naval na ría de Ferrol, un documento aberto ás achegas dos axentes sociais, e que debía concretarse nun plan industrial concreto.
En xaneiro deste ano a Consellaría de Innovación e Industria, no marco da Comisión creada a requerimento da mesma, presentou o Plan Industrial para o Estaleiro de Fene, baseado na desafectación de activos ociosos que hoxe existen en Navantia Fene, para poder construír buques civís e crear 250 postos de traballo directos e case 3.000 indirectos nun novo estaleiro. O promotor industrial desta iniciativa é a empresa Hijos de J.Barreras, e o finanzamento correría por conta de Caixanova e Caixa Galicia, co cal se demostra que se trata dun proxecto sólido e solvente. En calquera caso, a adxudicación de activos ociosos de Navantia ha de facerse mediante concurso público cos principios de competencia, publicidade e transparencia, pero queda demostrado que existe interese e proxectos serios para construír barcos en Fene.
Ante a consideración de que o sector naval é estratéxico non só en Ferrolterra, senón para o futuro de Galiza, o Goberno Galego e o Parlamento teñen reiterado nas últimas semanas o apoio unánime a este Plan.
Á vista do exposto, o Grupo municipal do BNG proponlle ó Pleno da Corporación de Cabanas a adopción dos seguintes
ACORDOS 1. Comunicarlle á Presidencia e Vicepresidencia da Xunta de Galiza o apoio do Pleno da Corporación Municipal ao Plan Industrial para o Estaleiro de Fene.
2. Instar á Presidencia do Goberno do Estado a
· Adoptar as medidas precisas que permitan que parte dos activos que no pasado pertenceron a Astano en Fene poidan ser desafectados pola SEPI e dedicados á construción naval convencional no ámbito civil.
· Garantir a plena carga de traballo na factoría de Navantia Fene.
· Presentar de contado o Plan Industrial para Ferrol previsto nos acordos de 16 de decembro de 2004.
· Que a SEPI, no suposto de que se adopte algún acordo que poida afectar aos/ás traballadores/as de Navantia Fene, garanta sempre que o actual persoal do estaleiro poderá optar por continuar dentro do sector público.
· Que a SEPI inicie coa Xunta de Galiza o deseño e impulso de novos proxectos de reindustrialización na comarca de Ferrolterra.
Asdo. Xosé Manuel Pérez Sardiña José Antonio Doce Luaces
Tampouco o alcalde solitario incluíu outra moción sobre o 8 de marzo.
MOCIÓN
ASUNTO: Sobre o 8 de marzo ‘Día Internacional das Mulleres’
Ó abeiro do establecido no artigo 27.3 do Regulamento orgánico municipal, e para ser debatida no próximo Pleno da Corporación o Grupo político municipal do Bloque Nacionalista Galego presenta a seguinte moción:
EXPOSICIÓN DE MOTIVOS
O consenso social conseguido canto á necesaria participación das mulleres na sociedade e canto á condena da violencia de xénero, non permitiu aínda a eliminación da lacra da violencia de xénero, nin evitou que aínda persistan obstáculos evidentes que dificultan que a sociedade responda plenamente ás necesidades e desexos das mulleres, así como que se teña en consideración a necesidade de traballar para eliminar a invisibilidade das mulleres ao longo da historia.
Estas dificultades veñen por parte das administracións públicas e por parte da sociedade mesma, que seguen a ofrecer resistencia aos cambios nun momento de tránsito entre unha cultura patriarcal a outra cultura de igualdade.
No marco político en que nos desenvolvemos, onde contamos con iniciativas e proxectos lexislativos concretos da Xunta de Galicia que teñen como fin, en materia de Igualdade, impulsar programas de acción dirixidos a eliminar os estereotipos sexistas e a violencia de xénero, e creados para promover de maneira transversal, a igualdade e a corresponsabilidade nas persoas e na sociedade, é importante que a administración local se sume a estas iniciativas e proxectos. Na loita pola igualdade de oportunidades e contra a violencia de xénero, é vital a coordinación e a cooperación entre todos os niveis da administración.
Na medida en que a administración local -polas oportunidades que proporciona a proximidade á cidadanía, e o coñecemento directo das súas necesidades e intereses- traballe para implementar políticas que incorporen a perspectiva de xénero, tendo en conta as particularidades das mulleres, e manifeste este compromiso de cara ás próximas eleccións locais, seremos capaces de acadar resultados.
Trátase de construír unha nova cultura na forma de facer política, co convencemento de que isto nos levará a unha sociedade máis igualitaria, integradora e solidaria.
Á vista do exposto, o Grupo municipal do BNG proponlle ó Pleno da Corporación de Cabanas a adopción dos seguintes
ACORDOS
Asumir como punto de partida ineludíbel no momento en que estamos, que as accións e medidas para acadar a igualdade son tarefa de toda a corporación municipal, corresponsabilizándose todas e cada unha das áreas de goberno de levalas a cabo.
Impulsar con firmeza o plano e os programas de igualdade tendo en conta as seguintes liñas estratéxicas:
- Crear, a través da coordinación coas administracións, servizos e recursos (ou potenciar os que xa existen) para a información, orientación e asesoramento ás mulleres que están a sufrir a violencia de xénero.
- Fomentar a Educación non sexista desde os Consellos Escolares, en colaboración coas ANPAs e o profesorado dos Centros Escolares.
- Promover programas de promoción da saúde, elaborados e desenvolvidos desde a perspectiva de xénero, en colaboración coas e cos profesionais da saúde do concello.
- Adoptar o compromiso no goberno municipal de marcar o obxectivo de equilibrar nos distintos órganos de xestión a presenza de mulleres e homes. Considerar a aparición igualitaria nas comparecencias públicas do Concello para promover a representación paritaria na toma de decisións e eliminar a linguaxe sexista de todos os textos do concello.
- Estabelecer que os estudos, estatísticas, informes, etc.., se fagan desde a perspectiva do xénero, na súa orientación, nos seus contidos explícitos e ocultos e, por suposto, na linguaxe que se utiliza para a súa exposición.
- Garantir que todas as organizacións que reciban financiamento público (contratas, servizos, subsidios...) adopten prácticas non discriminatorias.
- Promover a participación das mulleres nos medios de comunicación municipais a todos os niveis (xestión e produción de programas, redacción, realización, etc.) , no que se refire ao tratamento da imaxe da muller e da violencia de xénero, tanto na linguaxe explícita coma na oculta.
- Promover a recuperación da Historia das Mulleres, actuar localmente na súa recuperación, fomentando o seu coñecemento e recoñecemento mediante accións concretas de carácter divulgativo e rememorativo, promovendo a presenza das mulleres nos espazos públicos, nos nomes das rúas, prazas, e outros espazos.
Cabanas, 19 de febreiro de 2007Asdo. Xosé Manuel Pérez Sardiña José Antonio Doce Luaces
Aí tedes o interese dos políticos locais polo emprego, polo marabilloso reparto da produtividade (moción que ían estudar e que quedou no baúl dos recordos desde o mes pasado), pola muller (a través de bailes) e pola democratización e desenvolvemento de Cabanas.
Desde que goberna a dereita a cara descuberta este Concello vai de CU!