O Alcalde de Mugardos descoñece de que o acusa a fiscalía e no sumario non figura ningunha acusación contra el
Diante da comparecencia do Alcalde de Mugardos, Xosé F. Barcia, perante a xuíz do xulgado de primeira instancia e instrución nº4 de Ferrol, prevista para o vindeiro día 19, o BNG de Mugardos manifestou hoxe que “Barcia comparecerá coa máxima disposición a declarar e colaborar coa xustiza, pero descoñecendo de que o acusa exactamente a fiscalía”. O BNG considera relevante e positivo que “o propio fiscal xa adiantou na prensa que o alcalde de Mugardos non ten ningunha participación na suposta trama investigada, aínda que parece ser que existe a intención de o acusar de prevaricación, acusación que aínda descoñece, pero que se demostrará que é falsa”.
A decisión da xuíz de citar a declarar a Xosé F. Barcia o vindeiro día 19 baséase nun auto de sete páxinas ditado o día 16 de agosto pasado en que a única referencia ao alcalde en todo o auto consiste na acusación de “realizar xestións relacionadas con construcións dentro do concello, onde paraliza as mesmas a cambio de obter determinados beneficios para o concello”. Neste sentido, a única referencia no sumario a esta cuestión é a declaración do promotor Manuel Patiño quen asegura que “o concello o obrigou a modificar o proxecto e que a consecuencia desas modificacións houbo un aumento de cesións legais ao Concello”. En base a esa acusación, a xuíz, a instancias da fiscalía, autorizou en agosto as escoitas telefónicas ao alcalde de Mugardos, escoitas que, de acordo coa documentación obrante no sumario, non deron ningún resultado até o punto de que ningunha conversa do alcalde aparece no expediente.
Para o BNG estes datos son moi relevantes e ilustrativos e aínda que os nacionalistas non queren “de momento” valorar a posíbel intencionalidade política da actuación da fiscalía, consideran que o feito de que “se acuse o alcalde de beneficiar o concello e de que se espíe telefonicamente a un alcalde nacionalista sen ningún resultado é dabondo para que cadaquén saque as súas conclusións” e auguran que “o tempo porá a cadaquén no seu lugar”. En opinión do BNG “estase acusando ao alcalde e ao goberno local de facer o que debe facer un bon alcalde e un bon goberno en calquera concello, poñer o urbanismo ao servizo do interese público, logrando beneficios e cesións para o concello e ademais de forma legal e transparente”. O BNG subliñou que “en Mugardos non se acusa o alcalde de favorecerse a si mesmo ou de favorecer a amigos ou terceiros, nin se está investigando a un alcalde promotor e construtor, como acontece con cargos do PSOE ou do PP. En Mugardos acúsase a un alcalde do BNG de lograr beneficios para o concello. É realmente esperpéntico”, conclúen os nacionalistas ao tempo que lembran ademais que “no sumario e na investigación non se pon en cuestión nin en dúbida a legalidade de ningunha decisión do goberno nin do pleno en materia urbanística, decisións moitas delas avaladas ademais por informes e acordos da Xunta de Galiza. O que se investiga é se determinados técnicos incorrían en causa da abstención á hora de emitir os seus informes”.
Asemblea local do BNG de Mugardos
O alcalde compareceu perante a xuíz durante tres horas nas que o fiscal so formulou dúas preguntas sen concretar ningunha acusación
Barcia amosa a súa confianza na Xustiza e augura que as acusacións serán arquivadas
O Alcalde de Mugardos, Xosé F. Barcia, compareceu hoxe perante a xuíz do Xulgado de 1ª Instancia e Instrucción nº4 de Ferrol, para prestar declaración en relación coa investigación impulsada pola fiscalía nesta localidade. Na súa declaración no Xulgado, o Alcalde, segundo informa o BNG mugardés, “reiterou a súa disposición a colaborar ao máximo coa Xustiza para que esta resolva e esclareza todo coa maior axilidade, evitando xuizos paralelos e a vulneración da presunción de inocencia”. Ademais, Barcia amosou a súa “plena confianza na acción da Xustiza” e o seu convencemento de que “as acusacións contra min serán arquivadas en breve, unha vez declaren o resto das persoas, e se comprobe definitivamente que o Alcalde e o goberno municipal non teñen ningunha responsabilidade nos feitos que se investigan”.
Tres horas de declaración e só dúas preguntas do fiscal
A declaración do alcalde de Mugardos prolongouse por espazo de, aproximadamente, tres horas. Por parte da fiscalía só se formularon dúas preguntas, unha sobre a contratación por parte do concello dos servizos de Xscale polo período de seis meses e outra sobre contratacións posteriores a outras asistencias técnicas alleas á investigación. A outra acusación, neste caso a particular representada por Esquerda Unida, tamén formulou unicamente dúas preguntas, unha relativa novamente a Xscale, mentres a segunda foi retirada pola propia Xuíz ao considerala incomprensíbel. Para o BNG de Mugardos “é moi ilustrativo que en tres horas de declaración o fiscal só formule dúas preguntas e a acusación particular unha, todas elas de escasa relevancia e intrascendentes en relación cos feitos investigados, preguntas que foron debidamente respostadas por parte do Alcalde”. Os nacionalistas consideran “moi elocuente que unha forza política que está lanzando graves acusacións contra Mugardos, o alcalde e o goberno nos medios de comunicación, sexa incapaz de unha pregunta cando ten a oportunidade perante a xuíz de reclamar do Alcalde todas as explicacións”, o que en opinión do BNG “revela que algúns prefiren os xuizos paralelos e mediáticos para sacar tallada política en lugar de que todo se esclareza no xulgado”.
Segundo o BNG, logo de comparecer perante a xuíz, Xosé Barcia sigue descoñecendo “de que feitos concretos se lle acusa, pois nin a fiscalía nin a acusación particular foron capaces de concretar en actuacións ou decisións concretas do alcalde os delictos que lle atribuen”.
Ao marxe das preguntas da acusación pública e particular, o resto do tempo da comparecencia “foi empregado por Xosé Barcia en dar todas as explicacións, informacións e mesmo documentación que axude a esclarecer con rapidez a investigación”, indicaron os nacionalistas, “nun exemplo claro de cooperación e colaboración coa xustiza”. O Alcade explicou con todo luxo de detalles as decisións urbanísticas do concello, “poñendo de manifesto de maneira contundente e irrebatíbel a transparencia e legalidade das actuacións municipais”, conclúe o BNG.
NOTA ACLARATORIA: O BNG de Mugardos quere desmentir categoricamente que o concelleiro de urbanismo, Xose Antón Bouza, estea imputado na causa, tal e como nos últimos dous días aseguraron varios medios de comunicación. Solicitamos unha rectificación de ditas afirmacións por parte daqueles medios que sen rigor e sen respecto á verdade difundiron tal información e pregamos a máxima prudencia e o máximo rigor á hora de informar sobre as actuacións xudiciais relacionadas con este asunto.
